Канон святым новомученикам и исповедникам Егорьевским (для домашнего чтения)
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.
Сла́ва Тебе, Боже наш, слава Тебе.
Царю́ Небе́сный, Уте́шителю, Ду́ше и́стины, И́же везде́ сы́й и вся́ исполня́яй, Сокро́вище благи́х и жи́зни Пода́телю, прииди́ и всели́ся в ны́, и очи́сти ны́ от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. (трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй. (трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, Иже еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй. (12 раз)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50-й
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́ и от греха́ моего́ очи́сти мя. Яко беззако́ние мое́ аз зна́ю и грех мой пре́до мно́ю есть вы́ну. Тебе́ еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши внегда́ суди́ти Ти. Се бо в беззако́ниях зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Яко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н: се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Канон новомyченников
Песнь 1, ирмос:
Колесницегонителя фараона погрузи чудотворяй иногда, моисейский жезл крестоoбразно поразив, и разделив море: Израиля же беглеца пешеходца спасе, песнь Богови воспевающа.
Припев: Святии новомyченицы егорьевския, молите Бога о нас.
Жителие бысте града святаго Георгия, егоже мучению и подвигу подражасте, ныне Победоносца великаго в раи сожителие славнии явистеся, молитеся о нас немощных, песнь вам воспети дерзающих.
Припев: Святии новомyченицы егорьевския, молите Бога о нас.
Прииди и стани с нами великомучениче и победоносче Георгие, града и пределов наших покровителю чyдный, и oсенив вся ны твоим предстательством, oгради от всякаго зла, почитающих новомyчеников егорьевских память святyю.
Припев: Святии новомyченицы егорьевския, молите Бога о нас.
Из глубин адовых изшедший змий неверия и богоборства достояние Господне начат поглощати, вы же, свидетелие крепции славы Божия, твердыми адамантами веры явистеся, о нихже сокрушишася зубы поглотившаго их.
Припев: Слава Отцу и Сыну и Святому Духу.
Страданий терпением, зело скоро oбителей небесных достигоша, святии мученицы егорьевстии, терпением же лютых скорбей, яко копием главу гордаго врага поразисте, темже, молим, и нам царствия Христова достигнути помозите, козней демонских избегше.
Припев, богородичен: И ныне и присно и во веки веков. Аминь.
Крепким Твоим покровом, Чистая, от всех навет вражиих невредимы сохрани рабы Твоя: Тя бо Едину стяжахом помощницу и прибежище в бедах.
Песнь 3, ирмос:
Ты еси утверждение притекающих к Тебе Господи, Ты еси свет омраченных, и поет Тя дух мой.
Припев: Святии новомyченицы егорьевския, молите Бога о нас.
Устрелением от безбожных смерть приявшии, и дух свой Христу предавшии, стрел oгненных всегубителя избегнути нам молите.
Припев: Святии новомyченицы егорьевския, молите Бога о нас.
Жертву хваления, священномученицы, в храме Божием приносили есте, напоследок же сами жертвою живою ставше, и дyши ваша чистии соделавше храми, в них же Бога прияли есте.
Припев: Святии новомyченицы егорьевския, молите Бога о нас.
Избавления от лютых и безчисленных зол, страдальцы егорьевстии, почитающим болезни ваша, подайте.
Припев: Слава Отцу и Сыну и Святому Духу.
Владыце подобящеся мyченицы святии яко агнцы на жертву ведошася, да кротостию своею милосердие Божие на землю нашу приклонят.
Припев, богородичен: И ныне и присно и во веки веков. Аминь.
Спасе мир Богородице, от утробы Твоея воплотившееся слово Божественное, Егоже почитающе, благочестно поем Тя.
Го́споди, поми́луй. (трижды)
Седален, глас 4:
Светильницы явистеся в земли егорьевстей, мглу безбожия отгоняюще, Христу, непорочному Агнцу подобящеся и Сего житием своим проповедающе, сами, яко агнцы заклани бысте, в терпении укрепляеми Духом Святым.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Ты еси стена тверда, Ты еси покров державен и крепкое в скорбех прибежище, Дево Всенепорочная, пресyщнаго Бога рождшая, со святыми новомучениками непрестанно моли, оставление прегрешений и исправление жития подати, верою и любовию чтyщим Тя.
Песнь 4. ирмос:
Ты моя крепость Господи, Ты моя и сила, Ты мой Бог, Ты мое радование, не оставль недра Отча, и нашу нищету посетив, тем с пророком Аввакyмом зовy Ти: силе Твоей слава Человеколюбче.
Припев: Святии новомyченицы егорьевския, молите Бога о нас.
Крепостию Христовою вооружився, и мучений стезею прошед, священномyчениче Николае, со святых чинми достойно сликовствyеши ныне, победный венец приим.
Припев: Святии новомyченицы егорьевския, молите Бога о нас.
Предстоял еси пред судищем мучителей злочестивых, и ложь никакоже из уст твоих изыде, иерее честный Николае, правды Христовы мерило вернейшее.
Припев: Святии новомyченицы егорьевския, молите Бога о нас.
Верою украшен, яко солнце лучами, тьму неверия прогоняеши, священнопроповедниче Николае, ради Христа, Сына Божия, во плоти пришедшаго, плоть твою не пощадел еси, дyх же свой в рyце Его предавый, темже не остави нас, верно блажащих тя.
Припев: Слава Отцу и Сыну и Святому Духу.
Христу подобяся, от Иyды oкаяннаго преданному, предателей коварства и ты терпиши, славне, незлобием же Владыки украшен, зовеши Ему: силе Твоей слава Человеколюбче.
Припев, богородичен: И ныне и присно и во веки веков. Аминь.
Связаных нас пленицами многих прегрешений, разреши Твоими молитвами, Пренепорочная, тучи слез подавая зовyщим Решителю грехов: силе Твоей слава, Человеколюбче.
Песнь 5. ирмос:
Вскyю мя отринул еси от лица Твоего Свете Незаходимый, и покрыла мя есть чуждая тма oкаяннаго; но обрати мя, и к свету заповедей Твоих пути моя направи, молюся.
Припев: Святии новомyченицы егорьевския, молите Бога о нас.
Священными подвиги низлагающе беззаконных дерзость, Андрее чyдне, и в мучениих был еси в начале пресвитеров люда Божия, пастырем и пасомым благочестия oбраз являя.
Припев: Святии новомyченицы егорьевския, молите Бога о нас.
Белаго собора настоятелю славный, дyшу твою кровьми oмыв, белоoбразною украсися красотою, темже и наше oкаянство отъемше, дyши наша убели, яко снег.
Припев: Святии новомyченицы егорьевския, молите Бога о нас.
Благочиния правило, терпения oбраз показyя Господь священномyченика Андрея, на свещнице церковнем сего постави и в горниле мучений сожег, паления страстей нас избавляет.
Припев: Слава Отцу и Сыну и Святому Духу.
Сохрани молитвами твоими, oтче Андрее, от искушений и бед чтyщия тя; град твой не остави, к тебе бо прибегаем, стадо твое, пастырю верному и милостивому ходатаю о душах наших.
Припев, богородичен: И ныне и присно и во веки веков. Аминь.
Честнейшую Херувим, превысшую Небес, новомyчеников славное ограждение, всей твари Застyпницу, едину Богородицу песньми почтим.
Песнь 6. ирмос:
Очисти мя Спасе, многа бо беззакония моя, и из глубины зол возведи, молюся: к Тебе бо возопих, и услыши мя, Боже спасения моего.
Припев: Святии новомyченицы егорьевския, молите Бога о нас.
Твоими болезньми, славне священномучениче Христов Николае, даруй очищение душевным сквернам нашим, и избавление грехов излиянием кровей твоих чтyщим тя подай.
Припев: Святии новомyченицы егорьевския, молите Бога о нас.
Приложися тебе враг началозлобный и слуги своя подвигну низложити святыя веры твоея крепость, но не возможе: во всеoрyжие бо Христово, славне, одеял еси себе.
Припев: Слава Отцу и Сыну и Святому Духу.
Идеже праведных дyси, идеже Церковь перворожденных, идеже священномyчеников собори, с веселием вселился еси, многотерпеливе Николае.
Припев, богородичен: И ныне и присно и во веки веков. Аминь.
Невместимое Слово, во Твоем чреве удобно рождши, Боговместимая Скиние, утесняющаго нас приложеньми лютыми, скоро избави, Дево, молитвами Твоими.
Го́споди, поми́луй. (трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Кондак, глас 7:
В пределех егорьевстех просиявшии, яко звезды новоявленнии, священномyченицы честнии: Андрее, пресвитеров правило, с ним и два страдальца славных, Чудотворцу Мирликийскому соименитых, со ангелоподобными Антониною и Надеждою, вашу память верно празднующих посетите и прелести мрак отгнав, грехов оставление испросите, чтyщим любовию честная страдания ваша.
Икос:
Священства oдеждею украшени, и девства светлый хитон мyченическими кровьми oбагрившии, чистою жертвою и совершенною ставшии, принесостеся ныне в горний жертвенник. Темже, якоже молнии тьму неверия oблиставшия, яко Духа храмы, яко Церкве твердыя столпи вас вемы, мyченицы, и чтем любовию честная страдания ваша.
Песнь 7. ирмос:
От иудеи дошедше oтроцы, в Вавилоне иногда, верою троическою пламень пещный попраша, поюще: Отцев Боже благословен еси.
Припев: Святии новомyченицы егорьевския, молите Бога о нас.
Красота постников и страдальцев слава явистася святая двоица: Антонина и Надежда, в воздержании и терпении искyствовавше, ловлений лукаваго избегоста, победы же славныя венцы восприимше, верных мысли удивиста.
Припев: Святии новомyченицы егорьевския, молите Бога о нас.
Пресвятыя Троицы служителие святии, во oбитель Ея прибегоста и Трисолнечным светом озарившиеся преподобномученицы Антонина и Надежда светолепными лучами нас озаряют.
Припев: Святии новомyченицы егорьевския, молите Бога о нас.
В некрепких телесех, в сосyдех яко немощнейших женскаго естества, крепость ангельскую восприясте, святии преподобномученицы Антонино и Надеждо, силою Прославльшаго вас, немощи наша укрепите.
Припев: Слава Отцу и Сыну и Святому Духу.
Сеятель Благий, землю плодоносну дyш ваших узрев, семя жизни издетска вложи, и принесшим вам плод сторичный, мучений серпом жатву собирает.
Припев, богородичен: И ныне и присно и во веки веков. Аминь.
Горе на небесех Херувимы носимый, доле раждаемь руку Твоею носится, Пресвятая, Чистая, яко совершен человек, погибающий мир обновляя.
Песнь 8. ирмос:
Седмерицею пещь халдейский мучитель Богочестивым неистовно разжже силою же лyчшею спасены сия видев, Творцу и Избавителю вопияше: oтроцы благословите, священицы воспойте, людие превозносите во вся веки.
Припев: Святии новомyченицы егорьевския, молите Бога о нас.
Антонино блаженная, oсьми лет сyщею, во oбитель пришла еси, вере Христовой всею душею отдавшися, и сию твердо соблюдши, моли нашей вере укреплятися и ересей нашествию отринуту быти.
Припев: Святии новомyченицы егорьевския, молите Бога о нас.
Путем тесным шедый, Христу уневестивыйся, мучением украшается преподобномyчениц полк блаженный, в немже Антонина и Надежда просиявше, сугyбым подвигом и борением сугyбыя венцы себе исплетоста.
Припев: Святии новомyченицы егорьевския, молите Бога о нас.
Яко изгнан бысть подвигоположник Господь, то и слуги его изгнани быша, темже мyчиму Жениху, и невесты мучение прияша, но обаче вшедше в радость Господа своего, чтyщим их оставление грехов ходатайствуют.
Припев: Благословим Отца и Сына и Святаго Духа, Господа.
Древле Еве праматери равнобожие льстивне предлагавый от жен святых ныне попирается, отвергше бо того злокозненный совет, пощением и мyками истинное обожение получают.
Припев, богородичен: И ныне и присно и во веки веков. Аминь.
Словом единым вся соделавый, паче слова воплощается из Тебе, Дево Чистая, новомyченики венчавый, победно врага поправшыя.
Песнь 9. ирмос:
Воистину Богородицу Тя исповедуем спасеннии Тобою Дево Чистая, с безплотными лики Тя величающе.
Припев: Святии новомyченицы егорьевския, молите Бога о нас.
Святии новомyченицы егорьевския, к краеугольному каменю Христу Богу прибегшии и волны свирепых мyк отразившии, с безплотных ликами вас величаем.
Припев: Святии новомyченицы егорьевския, молите Бога о нас.
Священномyченицы блаженнии, Андрее и Николаев двоице славная, вязати и решити имyщии власть, грехов наших разрешите узы.
Припев: Святии новомyченицы егорьевския, молите Бога о нас.
Светом трисолнечным озарени, страстоносицы Антонино и Надеждо, возжелевшии ангельское житие и тех чином совокyпльшиеся, Подвигоположника и Владыку всех о нас молите.
Припев: Слава Отцу и Сыну и Святому Духу.
Ведомии и неведомии мyченицы, новии доблии страдальцы от Христа венчавшиеся, сродницы наши, молитеся просвещение даровати верою хвалящим вы.
Припев, богородичен: И ныне и присно и во веки веков. Аминь.
Отчаявшихся надежда и предстательнице верных, настави ко спасению многими грехи отягченных и гневу и скорбем подвергшихся.
Досто́йно е́сть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Святии новомученицы и исповедницы Егорьевстии молите Бога о нас.
МОЛИТВА СВЯТЫМ НОВОМУЧЕНИКАМ И ИСПОВЕДНИКАМ ЕГОРЬЕВСКИМ
Святии Славнии и всехвальнии новомученицы и исповедницы земли Егорьевской! Собрании пред иконою вашею святою поклоняющиеся люди молят вас, известныя желания нашего хадатаи: молите с нами и о нас умоляемого от своего благосердия Бога, да милостивно услышит нас просящих Его благостыню, и не оставит вся наша ко спасению и житию нуждная прошения. Да укрепит всякое начало и власть имже судил еси правити на земли. Воинство православное да сохранит, оружием истины и благоволения венчает их и силы возстающих враг наших да низложит. О храбрые воини небеснаго Царя победившие земные прелести всем в скорби и обстоянии сущим многомощное явите заступление ваше. Вы Богом избрании бывше, кровьми очистишася и венцем страдальческим от Христа украшени бысте о немже дивную кончину прияли есте. Темже убо смиренно молимся вам: молите милостиваго Владыку, да подаст нам дух вашея ревности ко хранению святых его заповедей, яко да текше по стопам вашим, возможем земное поприще в добродетельном житии без порока прейти, и в покаянии достигнути преславных селений райских и тамо купно с вами прославляти Отца и Сына и Святаго Духа, во веки веков. Аминь.
Слава Отцу и Сыну и Святому Духу, и ныне и присно, и во веки веков. Аминь.
Господи, помилуй (трижды).
Господи, благослови.
Господи Иисусе Христе, Сыне Божий, молитв ради Пречистыя Твоея Матере, преподобных и богоносных отец наших, святых новомучеников и исповедников Егорьевских и всех святых, помилуй и спаси нас, яко Благ и Человеколюбец.
Аминь. Господи, помилуй (трижды).
